Пьеса авторы – күренекле совет һәм Россия драматургы, прозаик, публицист һәм җәмәгать эшлеклесе, РСФСРның атказанган сәнгать эшлеклесе Туфан Миңнуллин. Спектакльнең режиссеры – Аяз Гыйләҗев исемендәге Яр Чаллы дәүләт татар драма театрының яшь һәм өметле сәнгать җитәкчесе Олег Кинҗәгулов.
Күрше авылдан килгән егетләр – Җәмил, Галим, Исмәгыйль һәм Шакур – чибәр, акыллы, тырыш Диләфрүз исемле кызга гашыйк. Егетләрнең һәркайсы кызның күңелен яуларга һәм үзара мәхәббәткә ирешергә тырыша. Диләфрүз үзенең кияүгә чыгарлык кандидатларын җентекләп күзәтә. Ә бәлки, чибәркәйнең йөрәге инде кемгәдер бүләк ителгәндер? Диләфрүз үзенең шаян дусты Сәҗидә белән берлектә дүрт кияү өчен бер мәзәк уен оештыра. Ахыр чиктә кем сайланыр? Тамашачылар бу сорауга җавапны спектакль барышында табарлар.
