Җәйге каникул вакытында балалар вакытларын файдалы һәм кызыклы итеп үткәрәчәкләр – аларны китаплар, мультфильмнар, халык йолалары һәм гореф-гадәтләре дөньясына мавыктыргыч сәяхәт көтә.
Балаларны татар милли киемендәге алып баручы каршы алачак. Күңелле уеннар, конкурслар һәм викториналар ярдәмендә ул аларны татарлар, үзбәкләр, таҗиклар, башкортлар, удмуртлар, чувашлар һәм башка халыкларның мәдәнияте белән таныштырачак. Балаларга аеруча татарларның «Буяучы һәм буяулар», башкортларның «Күгәрченнәр» һәм чирмешләрнең «Йөзек яшерү» уеннары ошар. Алар шулай ук халык бәйрәмнәрен: Сабантуй, Нәүрүз, Масленица, Нардуган, Питрау, Иван Купала һәм Карга боткасы бәйрәмнәрен искә төшерәчәкләр.
Китапханәгә милли киемнәрдә чирмеш һәм рус халыклары вәкилләре киләчәк. Алар үз халыкларының үзенчәлекле бәйрәмнәре һәм йолалары турында сөйләячәкләр. Рус кызы Аленушка балаларга халык иҗатын искә төшерергә тәкъдим итәчәк, һәм алар шатлык белән «Шалкан» әкиятен сәхнәләштерәчәкләр. Чара чувашларның «Идел батырлары. Иван – батыр» мультфильмын карау белән тәмамланачак.
