Яр Чаллы шәһәренең тантаналар сараенда 14 яшькә җиткән Россия Федерациясе гражданнарына паспортлар тапшыру тантанасы булды – 29 яшь шәһәр кешесе рәсми рәвештә ил гражданының төп документын алды.
Тантана Россия Федерациясе һәм Татарстан Республикасы дәүләт гимннарын башкару, бер минутлык тынлык һәм шәһәр филармониясе артистларының иҗади номерлары белән башланып китте. Документларны алганчы, катнашучылар паспорт тарихы һәм туган шәһәр турындагы фильмнарны карадылар.
Яңа паспорт ияләрен шәһәр мэры Наил Мәһдиев һәм Дәүләт Думасы депутаты Әлфия Когогина котладылар. Алар паспорт алу белән килүче җаваплылыкны билгеләп үттеләр һәм яшьләргә укуларында, спортта һәм иҗтимагый тормышта уңышлар теләделәр.
«Бүгенге вакыйга легендар КАМАЗлар төбәге булган Яр Чаллы шәһәренең төп залында, уйлавымча, сезнең һәм якыннарыгызның хәтерендә мәңге калыр, – дип мөрәҗәгать итте яшьләргә Наил Мәһдиев. – Без Россия Федерациясе гражданы паспортын тапшыру тантанасы югары дәрәҗәдә узсын өчен барысын да эшлибез. Россиядә паспортны мондый дәрәҗәдә тапшырган шәһәрләр күп түгел, һәм Яр Чаллы нәкъ менә шуның белән аерылып тора. Без монда, шәһәребезнең төп залында, яшь чаллыларыбызга изге теләкләр җиткерүне мөһим дип саныйбыз. Тормыш – катлаулы, ләкин бик кызыклы нәрсә. Һәрберегез үз юлын сайлар, ләкин Яр Чаллы шәһәре, сезгә тормышка юллама биргән гаиләгез кебек, сезнең өчен тормышта юл күрсәткеч йолдыз һәм һәрчак таяныч булыр».
Әлфия Когогина яшьләргә шәһәребез һәм илебез үсешенә лаеклы өлеш кертергә теләде, хокуклар белән беррәттән бурычлар да килүен искәртте: «Сезнең күпләрегез укуда, спортта, сәнгатьтә уңышларга ирештегез. Сез иҗтимагый эшчәнлек белән шөгыльләнәсез, актив иҗади тормыш алып барасыз. Һәм мин ышанам: үзегездә тәрбияләгән сыйфатлар – җиңүгә омтылыш, бер-береңә ярдәм итү, олыларны хөрмәт итү, максатчанлык – сезгә шәхси хыялларыгызны тормышка ашыруда бик ярдәм итәр. Мин сезнең Россия Федерациясенең лаеклы гражданнары булачагыгызга ышанам. Сез һичшиксез гаиләгез, шәһәребез һәм илебез өчен горурлык булырсыз».
Паспорт алучылар арасында төрле өлкәләрдә сәләтле яшьләр: робототехника белгечләре һәм программистлар, спортчылар һәм биючеләр, вокалчылар һәм рәссамнар, активистлар һәм волонтерлар бар. Аларның күпләре – төрле дәрәҗәдәге олимпиадалар, конкурслар һәм чемпионатлар җиңүчеләре.
Тантана гомуми фотога төшү һәм гаилә архивы өчен истәлекле фоторәсемнәр белән тәмамланды.
Тантанадан барлык фоторәсемнәр шәһәр администрациясенең рәсми ВКонтакте төркемендә урнаштырылган.